Is é príomhaidhm an tráchtais seo mionlogainmneacha agus páircainmneacha de bhunús Gaeilge i ngleannta Chontae Bhaile Átha Cliath a bhailiú le chéile in aon chnuasach cuimsitheach amháin, scrúdú a dhéanamh orthu chun corpas ceannfhoirmeacha Gaeilge a chruthú agus anailís a dhéanamh ar an gcorpas Gaeilge sin. Tá 323 logainm sa chorpas, a aimsíodh i bhfoinsí stairiúla, i gcnuasaigh áitiúla, ar sheantaifeadtaí cartlainne agus le linn obair pháirce. Tá an fhianaise scríofa agus fhoghraíochta seo leagtha amach, in éineacht le heolas ábhartha eile, in iontráil ar leith do gach logainm. Sa tráchtaireacht ar gach iontráil mínítear an anailís ar a bhfuil an moladh Gaeilge bunaithe. Pléitear leis an tacar ceannfhoirmeacha Gaeilge seo mar chorpas logainmneacha Gaeilge don cheantar taighde. Déantar anailís ar dhéantús na logainmneacha ó thaobh struchtúir de ar dtúis. Déantar iad a scagadh de réir aicmitheoirí agus cáilitheoirí ansin le gur féidir na heilimintí sin a rangú go tíopeolaíoch ar mhaithe le solas a chaitheamh ar an bpatrún logainmníochta Gaeilge sa cheantar. Déantar anailís den saghas céanna ar chorpais eile mionlogainmneacha Gaeilge laisteas agus lastuaidh den cheantar taighde agus cuirtear na torthaí i gcomparáid le chéile. Tarraingítear aird ar ghnéithe áirithe d’fhuaimniú na logainmneacha béarlaithe a d’fhéadfadh a bheith ina leid ar bhunfhuaimniú na logainmneacha i nGaeilge dhéanach na háite. Tarraingítear aird ar ghnéithe den phróiseas béarlaithe féin freisin. Ar deireadh, féachtar ar na mionlogainmneacha Béarla sa dá ghleann. Cuirtear an cóimheas páircainmneacha Gaeilge : Béarla sa cheantar taighde i gcomórtas le dhá cheantar eile ina bhfuil sonraí inchomparáide le fáil. Déantar rangú tíopeolaíoch ar na páircainmneacha Béarla sa dá ghleann chun spléachadh a fháil ar an bpatrún logainmníochta sa teanga sin is féidir a chur i gcomparáid leis na mionainmneacha de bhunadh na Gaeilge a mhaireann taobh leo.